وحدتنه............... نصر

وحدتنه ...نصر

أبدي امن الصفر بس انته إبدي ويـاي
وانه بهـا لوطـن عنوانـي عنوانـك

لاهيّن عليك يمـوت عنـدي حسيـن
ولا هيّـن علـيَّ يمـوت عثمـانـك

عثمانك اخوي ولجلي ضحـه ومـات
وحسيني أنذبح جـي نصـر خوانـك

إحنه ابفـد قضيـة ويشهـد التاريـخ
عدوان ألعلـي شـو نفـس عدوانـك

شرياني أنتصر جي دمـك يمـر بـي
ودمي الهالوكت مـا عـاف شريانـك

شكَد زرعوا فتن بس ما خضعت بيوم
رفضت آنه الفـرح لعيـون أحزانـك

وجازيت ووفيت وصرنـه إيـد بإيـد
وإيمانـي ثبـت مـن قـوة إيمانـك

أبكل محنه التمر من كَبل مـا أنخـاك
تدكَ بابـي وتجـي وتجيـب قربانـك

وشنهـوه التغيـر حتـه أزل ويـاك
لا مرسـل إجـه ولا ضـاع قرآنـك

وطنه اجروحه تنزف والنزيف أرواح
مـا يحتـاج أحشـم طيـب وجدانـك

إذا نجمع شملنه اجروحه كلهه تطيـب
كملـت خيمتـي ومعتـازه عمدانـك

حدر خيمة وطنه ونحسـم الموضـوع
والبكَلبـك أريـد اتكَولـه بلسـانـك

أريد أزرع ورد بس شرط عندي ابهاي
شرط ماريد أزرعـه ابغيـر بستانـك

وأريدن هالورد مـن مايـك إترويـه
وتسولـف قصتـه كَـدام رضعانـك